Шупашкарта пурăнакан Владимир Катин хăй тĕллĕн килтен тухса çÿреймест. Вăл ДЦПпа чирлĕ. Çапах каччă пуç усмасть. 33-ри Вовăн тус-юлташĕ тĕнчипех саланнă. Вăл вĕсемпе интернет урлă çыхăну тытать.
Катинсем Инçет Хĕвел тухăçĕнче пурăннă. Кил хуçи арăмĕ ача садĕнче поварта тăрăшнă. Пĕр çухрăмра вырнаçнăскере çитмешкĕн пилĕк таран хÿсе лартнă юр тăрăх ашма тивнĕ. Пÿре чирĕпе аптăракан хĕрарăм чăн-чăн нуша курнă. Ача кĕтекенскер çил-тăманра ĕçе васканă, садикрен киле чупнă.
Йывăр ĕçлени витĕм кÿнĕ — Вова 6 уйăхранах çуралнă. Çут тĕнче илемне курма васканăскер 1,4 килограмм тайнă. Хабаровскран çитнĕ невропатолог пепке сывлăхне тĕрĕсленĕ те амăшне лăплантарнă: «Ача сывă».
Вовăна пулăшакансем пур. Вĕсен хушшинче Дмитрий Тарасов паллă футболист та пулнă. Спортсмен ун патне шăнкăравланă, ăна мĕн кирлине ыйтса пĕлнĕ. Германире операцие хатĕрленекен Дмитрий сусăр каччăпа çыхăнсан электрокÿме парнелес шухăш пуррине пĕлтернĕ.
Алевтина Николаевна паллă спортсмен сăмахĕсене ĕненесшĕн пулман, ывăлне шăнман пăр çине лартса хăварасран шикленнĕ. 2013 çулта Дмитрий Тарасов парни çитнĕ. Электрокÿмене килех илсе килсе панă